Fjörtíu og fjórir dagar í Bakkarölt 2010

Heil og sæl gæskurnar,

Nú er tími til að hafa smá upplýsingapistil.

Bókun á Bakkaröltið tók skarpan kipp eftir  póst  frá yfirfjárhirðinum.  Nú eru 42 fermdir hausar búnir að skrá sig  (eða aðrir hafa staðfest skráningu fyrir þá), 10 kollar  5 – 13 ára og svo eru 6 ungar yngri en 5 ára ef talning er rétt.  Þetta er mjög ánægjulegt  og  hefur Nembdin  lúmskan grun um að það séu ekki allir búnir að skrá sig sem ætla að koma. 

Í fyrra upplýsingarpistli vantaði að útskýra að Staðarskarð er fjallvegurinn á milli Fáskrúðsfjarðar og  Reyðarfjarðar – vel  akfær. Síðan hann var í notkun eru 2 kynslóðir vega þarna á milli.  Lagt upp ekki langt frá Höfðahúsum.

Tjaldbúar verða að vera sjálfbærir með vatn. Hægt verður að sækja vatn inn í Tunguholt en hvert tjald verður að vera með sínar eigin vatnsbirgðir. Ekkert vatn verður við klósettin.

Þar sem Nembdin gat ekki útvegað húsnæði allt á sama stað mun hún leitast við að vera með sætaferðir á laugardagskvöldinu eftir þörfum á milli Tunguholts og Grunnskólans fyrir þá sem þess óska. Nembdin er einnig búin að láta íbúa Tungu vita að við erum ekki alltaf komin til náða fyrir miðnætti.  Því var vel tekið með þeim orðum að „það verður bara gaman að heyra að er líf á svæðinu.“

Nú er bara að finna eitthvað sem hægt er að fara í YFIR við. Þótt Nembdin sé stór dugir hún ekki til slíks jafnvel þótt hæstu þátttakendum  væri bætt við.  

Öll skemmtiatriði eru vel þegin. Nembdin er hálf geld hvað það varðar.  En maður er nú manns gaman eins og við gamla fólkið segjum (þ.e. hinn fullorðni hluti nefndarinnar) - og svo er það  félagsvistin sem Hildur G. ætlar að stjórna með tilheyrandi verðlaunasætum.

Með bestu kveðju  út í sumarið,

Nembdin

 

Óvissuþættir:

• Veðrið?
• Hvað koma margir í Bakkaröltið 2010?
• Verður búið að slá túnið í Tunguholti?
• Hverjir vilja fóstra Fúsa flakkara  næsta Bakkaröltsár?

Athugasemdir

[Hildur Soffia (IP-tala skráð) 17.5.2010 kl. 22:53]

Flott plan! Buin ad skra mig munnlega hja muttu. Hlakka mikid til, ekki sist ad spila a laugardagskvoldinu : ).

[Steinunn A (IP-tala skráð) 17.5.2010 kl. 23:00]

Já spennan eykst með degi hverjum. Stefnan sett á Kerlingu um helgina eftir mikið hopp og hí síðustu daga á MOSÖLD, veit að fleiri æfa stíft þessa dagana og príla upp á allar þúfur sem á vegi verða.

.... ætla rétt að vona að skammarverðlaunin verði vegleg ...

[Huld (IP-tala skráð) 18.5.2010 kl. 09:06]

Glimrandi! Skipulagið klárt, gönguferðir, vatn og Fáskrúðsfirðingar aðvaraðir (enda heyrt að sumir vilji heldur lána húsin sín og vera að heiman við innrásina)... Kerling á leið á Kerlingu og búið að redda fari af ballinu Ekki spurning að það verður bara gaman... og svo það sé á hreinu ... þegar ég spila, spila ég til að vinna!