Bakkarölt 2009

 

Kæru Bakkaröltarar.

Jæja nú er helgin okkar að nálgast og eitthvað eru Fúsa-fóstrur farnar að huga að undirbúningi.  Við teljum okkur vera búnar að ná samningum við "veðurguðina"  þannig að það ætti að vera í höfn.  Við báðum um sólskin og örlítinn andvara (til að feykja burt vargi).  Hversu mikið var tekið mark á okkar bón kemur síðan í ljós.

Eins og áður hefur komið fram þá höfum við aðsetur  í Stórutungu.   Stóratunga er austanmegin í Bárðardal og er vegalengdin ca 45 km frá Goðafossi og  22 km frá  Stöng í Mývatnssveit. 

Í Stórutungu eru tvær íbúðir með 7 herbergjum.  Stofan á efri hæð verður ætluð fyrir svefnpokagesti.  Eldhús og baðherbergi með sturtu er á báðum hæðum og salernisaðstaða í inngangi fyrir tjaldbúa.   

Aðstaða fyrir tjaldbúðir er skammt frá húsinu.    Samkomutjöld í ýmsum stærðum verða á staðnum, þar sem aðstaða verður til leikja, sameiginlegra máltíða og bara það sem okkur dettur í hug.   

Grillpartýið verður á laugardagskvöldið.  Þar verður boðið upp á kjöt, meðlæti og gos.  Aðrar "veigar" verður hver og einn að sjá um sjálfur og einnig viljum við biðja ykkur að hafa meðferðis hnífapör og stóla hver fyrir sinn "bakkarass"

 

Drög að dagskrá:

25. júní - fimmtudagur -- Stóratunga - Aldeyjarfoss - Stóratunga

Við fáum staðinn afhentan kl. 12:00 og er þá góður tími til að mæta á staðinn og koma sér fyrir.

Kl. 18:00 -  Róleg kvöldganga frá Stórutungu að Aldeyjarfossi og jafnvel að Ingvararfossum sem er aðeins ofar í Skjálfandafljóti.   

Þetta er ca 5 - 7 km göngutúr.

Fyrir þá sem vilja ekki ganga er gaman að keyra að Ingvararfossum og Hrafnarbjargarfossum sem eru mjög fallegir fossar ennþá ofar í Fljótinu.

 

26. júní - föstudagur -- Leirhnjúkur - Dalfjall - Jarðböð - Dimmuborgir

Kl. 9:00  - Lagt verður af stað frá Stórutungu og ekið upp í Jarðböðin í Mývatnssveit.  Farið verður  yfir Mývatnsheiði frá Engidal að Stöng.  Það er grófur malarvegur en fær öllum bílum.  Áætlað er að hittast við Jarðböðin kl. 10:00, sameinast í bíla og aka síðan að bílastæðinu við Leirhnjúk.  

Gengið verður frá Leirhnjúk og um Þríhyrninga.  Hrauná rennur milli Þríhyrninga og Dalfjalls og þar verður nestisstopp og  þeir sem vilja ganga hluta leiðar eða bara njóta nestis með okkur koma þangað.  Vegurinn er til vinstri um borplön rétt áður en komið er að Kröfluvirkjun.  Síðan göngum við upp á Dalfjallið,  að Námaskarði og þaðan í Jarðböðin.   

Þetta er u.þ.b. 10 - 11 km gönguleið og er auðveld fyrir alla fætur. 

Eftir gönguferðina er tilvalið að senda fólkið í bað.  Það getum við gert  í Jarðböðunum eða  sundlauginni og jafnvel í Grjótagjá fyrir þá allra hraustustu. 

Eftir baðið ætlum við að hittast í Dimmuborgum, Reinarfólk að monta sig af framkvæmdum á staðnum og reyna að eiga viðskipti við ættingjana og vini.  Fyrir þá sem sem ekki hafa fengið nóg af gönguferðum er upplagt að rölta aðeins um Borgirnar.

 

27. júní - laugardagur -- Suðurá - Stóraflesja.

Kl. 9:30  - Brottför frá Stórutungu og ekið upp í Svartárkot.  Þaðan er farinn slóði að Suðurá sem er fær öllum stærri fólksbílum ca 5 km eða þar sem malarvegur endar.  Hér byrjar gönguferð þeirra sem vilja ganga 14 - 15 km.  Aðrir fá far með Jeppum og ekið verður aðeins lengra eða ca  2,5 km að Stóruflesju.  Þar mun hópurinn sameinast og ganga saman upp með ánni 4 - 5 km og til baka aftur að Stóruflesju.  Slóðinn frá Stóruflesju og upp með ánni er fær jeppum og er því lítið mál að hafa bíl með allan tímann. Þessi gönguferð er mjög auðveld fyrir alla fætur og má alveg mæla með strigaskóm.

Sameiginlegt grill verður í Stórutungu um kvöldið.  Timasetning ákveðin síðar.

 

28. júní - sunnudagur.

Vakna,  teygja úr sér,  pakka saman og skila staðnum kl: 12:00, knúsast og  bruna síðan hver sína leið og Fúsi með nýja fósturforeldra ...???

 

Nokkrar hagnýtar upplýsingar:

Þá er það, hvað hitt og þetta kostar og ath verðin miðast við alla helgina.

Herbergi í Stórutungu án rúmfata       6.000,-  pr. fjölskyldu

Dýna í stofu                                                  2.000,-  pr. fjölskyldu

Tjaldstæði                                           2.000,-  pr tjald, vagn, hýsi eða hús

Sameiginleg aðstaða                          1.000-,          fyrir fermda hausa og eldri

Grillpartý                                            1.500,-  fyrir fermda hausa  og eldri

Grillpartý                                            1.000,- fyrir 7 - 13 ára börn

Frítt fyrir börn undir 6 ára aldri

Tilboð í Jarðböðin ef greitt er fyrirfram          1.000,- fyrir 11 ára og eldri

 

Við munum senda ykkur excel-skjal þar sem útreikningar eru á gistingu, aðstöðu og grillpartýi en varðandi aðgangseyri í Jarðböðin þarf hver og einn að bæta því  við.  Ef  það eru villur í skráningu hjá okkur þá hafið samband við Huldu í síma 5650751 eða 8464450.

Við höfum stofnað reikning á nafni Bakkarölts á kennitölu Valdísar.  Reikningsnúmer er að finna í skjalinu. 

Við viljum biðja ykkur um að greiða inn  á þann reikning fyrir miðvikudaginn 24. júni og  senda kvittun á  [e-mail]  með skýringum hver greiðandinn er.

Sá afgangur sem verður eftir á reikningnum eftir helgina mun ganga til næstu nefndar.

 

Annað sem gott er að vita.

• Við Stórutungu er ekkert skipulagt leiksvæði þannig að það þarf að hugsa fyrir því.
• Næstu matvöruverslanir eru í Mývatnssveit ( ca 50 km) og á Fosshóli ( 45 km).
• Nauðsynlegt er að hafa vargskýlu því þetta er mý-svæði bæði Mývatnssveitin og  Bárðardalurinn. Gott er að hafa derhúfu undir vargskýlunni.

 

Jæja, þá er bara eftir að pakka saman, skutla fjölskyldunni inn í bíl og bruna af stað....

Kveðja, Fanney, Steina Ósk og Hulda

Athugasemdir

[Valdís frænka (IP-tala skráð) 18.6.2009 kl. 13:08]

Takk Fúsafóstrur - þetta eru mjög vel unnið og hér eftir er ekki hægt að kenna um upplýsingaskorti ef eitthvað vantar í útbúnað.   Það vildi ég að sama virkni  væri á öllum mínum innlánsreikningum og hefur verið á Bakkaröltsreikningnum þennan morguninn.  Þótt sé núna norðan, rigning og skí.. kuldi, þá skulum við ekki örvænta því á langtímaspá á weather.com er í það minnsta spáð hlýrri rigningu 

Kv.

Valdís frænka

[Valdís frænka (IP-tala skráð) 19.6.2009 kl. 08:51]

Ég verð að segja að það er mjög spennandi að sjá hvað kemur úr 9 pakkanum hans Kidda . 

Kv.

Valdís frænka

[Stella (IP-tala skráð) 19.6.2009 kl. 09:02]

Ég er byrjuð að pakka!!! og ég geymi smá horn í töskunum okkar til þess að koma nokkrum celciusgráðum og sólargeislum með:)

Kveðja Stella

[Auður (IP-tala skráð) 19.6.2009 kl. 13:38]

Hérna hér, ef við ætlum að baða okkur í jörðinni og greiða fyrirfram, hvenær má gera ráð fyrir að þær greiðslur fari fram?

....eða er meiri stemming fyrir Gjánni?? Ég myndi nú alveg vera til í að sjá Tönturnar mynda sig við að baða sig þar....maðr þarf nú ekki að minna á kvenlegginn sem þær koma frá, er það?

 Kveðja Auður

[Tanta Hildur (IP-tala skráð) 19.6.2009 kl. 21:01]

Elskurnar mínar. Ég finn ekki Excel-skjalið með þátttakendum og útreikningum og reikningsnúmeri. Vill einhver hjálpa gleraugnaglámnum? 

[Steina Ósk (IP-tala skráð) 20.6.2009 kl. 09:07]

Auður mín, það er best að greiða fyrir Jarðböðin með hinu þ.e. ef þú ert ákveðin en fyrir þá óákveðnu þá má greiða í lok gönguferðar á föstudaginn.  Ég vara við að Grjótagjá er dálítið heit.... alla vega fyrir börn og viðkvæma .....

Hildur mín... fékkst þú ekki póstinn með excel skjalinu eða ertu útundan..... ég skal tékka á hvort rétt póstfang hafi ekki verið á sendinunni

 kv. Steina Ósk